CEBU CITY — Nangita pa ug dugang saksi, ingon man dugang nga CCTV footages sa dapit kung diin gibanhigan patay si Ret. Senior Inspector Edmund Junco may Sitio Nasipit, Barangay Talamban, syudad sa Sugbo.
Gisaysay ni Police Colonel Josefino Ligan, Cebu City Police Office Director, nga padayon ang ilahang imbestigasyon sa kamatayon sa ilahang kaubanang pulis ug gisiguro nga makab-ot ang hustisya alang niini.
Matud pa ni Col. Ligan nga usa sa ilahang gilantaw karun mao ang pagpanerbisyo niini kaniadto sa CIDG diin giingong dagkong kaso usab ang gihuptan sa naasoy nga retired police.
Basi sa ilahang inisyal nga nasayran, giingong wala man kini negosyo sa dihang miretiro, diin usa na lang kini ka ‘plain and simple citizen’, kinsang nag-enjoy na lang sa iyahang retirement.
Gipahibalo usab ni Ligan nga sa pagkakarun, dili pa nila mahinabi ang asawa sa biktima nga si Betty Junco, kinsang nagpabilin pa sa gihapon sa tambalanan human nga nakaangkon usab ug samad pinusilan sa buko-buko ug sa li-og niini.
Nanawagan ang CCPO Director sa mga nakasaksi o mga adunay kasayoran sa nahitabong krimen, ang mupatim-aw ug makig-alayon sa kapulisan, arun nga masulbad ug mahatagan ug hustisya ang kamatayon sa retiradong pulis. /GBS
