CEBU CITY – Nakatala ang Department of Health – Region 7 (DOH-7) og 44 ka mga bag-ong kaso sa coronavirus disease o COVID-19 sa Central Visayas, sumala pa sa latest case bulletin.
Gikan sa 21,276 total cumulative cases sa rehiyon, 1,134 na lang ka mga pasyente ang nagpaalim sa mga tambalanan ug gibantayan isip mga active cases.
Anaa na usab sa 18,849 ka mga total recoveries sa rehiyon human nangaayo sa coronavirus ang 107 ka mga pasyente.
Samtang walay nadugang nga bag-ong nitaliwan human natakbuyan sa virus hinungdan nga anaa gihapon sa 1,293 ang total deaths niini.
Natala ang 46 ka mga bag-ong nagpostibo human nipagawas ang ahensya og lapas 2,500 ka mga test results gikan sa siyam ka mga laboratoryo sa rehiyon.
Nakatala anga Cebu City og 18 ka bag-ong kaso, usa ka kaso sa Lapu-Lapu City ug duha ka kaso sa Mandaue City. Samtang adunay 20 ka mga bag-ong mga natalang kaso sa Cebu Province ug tulo ka kaso sa probinsya sa Bohol.
Sa tibuok Pilipinas, nakatala ang DOH og 2,825 ka mga bag-ong coronavirus cases hinungdan nga nisaka ngadto sa 329,637 ang total cumulative cases sa nasud.
Sa tibuok kalibutan, anaa na sa 35.9-million ang total confirmed cases sa COVID-19 apan anaa na lang sa 7.8-million ang active cases, as of 3:00AM.// EKP
