CEBU CITY — Nagpaalim karon sa tambalanan ang usa ka 20-anyos nga lalaki human gidunggab sa usa ka menor de edad sa Sitio Sangi, Barangay Alegria, sa lungsod sa Cordova human sa ilang init nga diskurso.
Base sa inisyal nga imbestigasyon, naglalis ang biktima nga si Christian Obatay ug ang usa ka 16-anyos nga lalaki gumikan lang sa wala gituyong panagbangga.
Gisaysay ni Police Corporal Allan Vercede sa Cordova Police Station nga aksidenteng gibangga sa naka-motor nga suspek ang nag-bike nga si Obatay kagahapon.
Matud ni Vercede nga nagkainit ang diskurso sa duha hangtud nga gibunlot sa menor-de-edad ang kutsilyo dayon og dunggab ngadto sa biktima.
Kalmado hinuon nga nagpatabang ang biktima ug gidala dayon sa tambalanan aron lang matangtang ang kutsilyo nga nasaksak sa iyang likod.
Nadakpan dayon ang suspek human nipahigayon og follow-up operation ug anaa kini karon sa kustodiya sa kapulisan. (report by Bombo Joann Gantalao/gn)
