CEBU CITY — Anaa sa luwas nga kahimtang ang 10 ka mga indibidwal human na-rescue sa mga sakop sa City Disaster Risk Reduction and Management sa kadagatan sa Lapu-Lapu City.
Matud sa social media post ni Mayor Junard “Ahong” Chan nga naabtang nag-utawutaw sa kadagatan ang mga nahisgutan human na-stranded sa kadagatan gumikan sa kusog nga uwan og balod.
Nasayran nga nibyahe ang 10 ka mga tawo gikan sa Marigondon wharf aron mag-island hopping kagahapon sa buntag.
Apan sa dihang mibalik sila sa pantalan, naabtan sila sa bating lakat sa panahon hinungdan nga dili sila makanaug sa gisakyang pumpboat.
“Apan, wala nila damha nga sa pagbalik na unta nila sa pantalan nibunok ang kusog nga uwan ug dagkong balod hinungdan nga dili na sila makanaug sa pambot,” sigon pa ni Chan.
Daling niresponde ang DRRMO team kaganihang tungang gabii ug gi-rescue ang mga sakay diin mga sakop kini sa pamilya, kaparentihan, ug mga silingan.
Gipasalamatan ni Chan ang CDRRMO Head nga si Nagiel Banacia ug mga emergency responders niini gumikan sa dinaliang pagresponde ug pagluwas.
