CEBU CITY — Gitawag ni Lapu-Lapu City ABC President Kapitan Eddie Cuizon nga ‘binata’ nga pama-agi ang gihimo sa responsable nga nikandado sa buhatan sa ABC President niadtong nakalabay’ng adlaw.
Matod ni Cuizon nga wala’y problema kaniya kung papahawa-on sa iyang opisina basta kay nahisubay lang sa legal nga pama-agi.
Segon pa niini nga angayang istoryahan kung aduna man kini nahimong sayop ug dili ipa-agi sa matod pa dili professional nga lakang.
Dako ang pagtoo ni Cuizon nga adunay nagplano sa pagkandado sa iyang buhatan sanglit gihimo man gyud matod pa nga sirad-an ang iyang opisina nga wala magpahibalo kaniya.
Lakip sa mga lakang nga gikatakdang himu-on sa opisyal mao ang pagsuwat sa buhatan ni Lapu-Lapu City Mayor Juanrd ‘Ahong’ Chan aron pa-imbestigaran sa Mayor ang nahitabo.
Gibutyag pa niini nga dako ang posibilidad nga adunay sagol pulitika ang nahitabo sanglit wala man matod pa’y laing posibleng motibo aron kandaduhan ang iyang buhatan.
Kahinumduman nga nasuta na lang sa usa sa mga trabahante sa ABC President nga naka-lock ang opisina niini hinungdan nga giguba na lang ang kandado aron makapadayon sa ilang pagtrabaho ang mga personahe sa ABC President’s Office.
Giimbestigaran na karon sa kapulisan ang maong insidente human kini midangop sa kapulisan. (gbs)
