CEBU CITY — Gibutyag ni Cebu City Councilor James Cuenco nga posibleng aduna na’y magdangan nga pipila ka units sa traditional jeepneys sa dakbayan sa Sugbo sa Huwebes sa hapon, Nobyembre 12.
Matod sa Konsehal nga nagpadayon karong adlawa ang pagpa-ubos sa mga jeepney drivers sa swab testing diin masayran ang resulta niini ugmang adlawa.
Sigon sa opisyal nga gamay lang ang ‘turn-out’ sa mga drivers nga na-test sa COVID-19 sanglit daghan matod pa ang posibleng wala makalusot gikan sa probinsiya gumikan sa subling pagpatuman sa istriktong border control.
Hinu-on malaumon kini nga ugmang adlawa maka-apas usab ang ubang mga drivers nga wala makapa-swab test.
Samtang sa adlaw’ng Huwebes, ablihan ang ‘one-stop-shop’ diin ipahigayon ang pag-inspect sa mga jeeney units diin sa oras nga makuha na sa drivers ang ilang ‘certification’ otomatik na kini matod pa sa konsehal nga makapamasada.
Subay niini, gi-angkon ni Cuenco nga gikulbaan kini sa sitwasyon ilabi na nga gikabalak-an karon ang posibleng pagsaka ug balik sa kaso sa COVID-19 sa dakbayan.
Gipunto sa konsehal nga dili usab layo ang posibilidad nga ma-suspenso pagbalik ang pagpamasada sa mga PUJs hinungdan nga gihangyo niini ang publiko nga pabiling magmatngon ug mosunod sa mga health protocols batok sa coronavirus. (gbs)
