CEBU CITY — May kalabutan sa ilegal nga drugas ang usa sa gilantaw nga anggulo sa kapulisan kabahin sa kamatayon sa usa ka lalaki kinsang nakit-an ang patayng lawas niini sa Brgy. Garing, lungsod sa Consolacion, Cebu.
Gitumbok sa kapulisan ug mga kabanay ang biktima nga si Vincent Cañada, 29-anyos, ug nagpuyo sa Brgy. Lorega, dakbayan sa Sugbo.
Una niini, nakit-an sa usa ka concerned citizen ang lawas ni Cañada nga wala nay kinabuhi sa bukirang bahin sa maong barangay kagahapon sa buntag diin gihiktan ang kamot niini og cable tie ug gibutangan og duct tape ang nawong.
Matud ni Police Master Sgt. Achilles Bacorta sa Consolacion Police Station nga narekober gikan sa bulsa sa biktima ang pipila ka gagmay nga pakete sa shabu.
Gitumbok mismo sa kapulisan ang identity sa biktima base sa mga patik sa iyang lawas ug natultulan kini sa mga kabanay niini human midangop sa punerarya.
Gipaubos karon sa background check ang biktima aron masubay kung unsa man ang giingong kalambigitan niini sa ilegal nga drugas subay na sa iyang kamatayon. (gn)
