CEBU CITY — Anaa na sa 104 ka mga Traditional Public Utility Jeepney (PUJ) ang gi-isyuhan og Special Permit sa Land Transportation Franchising and Regulatory Board (LTFRB-7) nga makabiyahe balik sa dakbayan sa Sugbo.
Sa gipagawas nga advisory sa LTFRB-7, adunay 15 ka mga rota sa traditional jeepney ang nakadagatan na balik sa kalsada.
Gilangkuban kini sa rota nga 04C diin adunay 16 ka jeepney units; 06B nga adunay 14 ka units; 12D ug 12G nga adunay 11 ka units; 04D ug 04L nga adunay tag-siyam ka units; 06C nga adunay pito ka unit; 12L nga adunay unom; 09C nga adunay lima; 09G ug 10F nga adunay tig-upat; 08G nga adunay tulo; 11A ug 13C nga adunay tag-duha ka unit; ug usa unit ang gikan sa 06G.
Kini ang mga rota nga adunay dyip nga gitugutang makadagan pagbalik sa syudad.
Samtang, nagpadayun gihapon ang proseso sa One-Stop Shop nga gipahigayun sa Cebu City Jeepney Taskforce ubos sa pagdumala ni konsehal James Cuenco.
Tumong niini nga makatabang ang mga dyip sa passenger demand sa public transportation ilabi na nga gi-ablihan na balik ang ekonomiya sa syudad.
