CEBU – Gibutyag ni Cebu City Mayor Edgardo Labella nga gitugotan niini ang plano sa konseho nga i-realign ang P500 million nga pondo nga alang sa pagpalit ugbakuna batok sa COVID-19.
Una niini, gibutyag usab ni Cebu City Vice Mayor Michael Rama nga mamahimong gamiton ang pondo sa paghire ug dugang vaccinators ingon man pagpalit ug mga ekipo ug supplies alang sa nagpadayong vaccination rollout sa dakbayan. Nasayran nga nagpasalig ang National Government nga lakip ang syudad sa Sugbo nga prayoridad sa libreng suplay sa bakuna.
Samtang nanawagan ang Mayor ngadto sa wala pa nagpabakuna nga magpaturok na sa COVID-19 vaccine aron malikayan ang ka-delikado sa coronavirus. Kung mahimo likayan matod pa sa Mayor ang pagpili ug bakuna aron dili malangay sa pagbaton ug antibodies batok sa makamatay’ng kagaw.
Kahinumduman nga nadawat na ni Labella ang unang dose sa COVID-19 vaccine niini nga Sinovac ug madawat niini ang ika-duhang dose sa Hunyo kwatro ning kasamtangang tuig.
