CEBU CITY – Gipaubos na sa Alert Level 1 ang Cebu City sugod karung adlawa, Marso 16 hangtud sa Marso 31.
Gipadayag ni Cebu City Councilor Joel Garganera, Emergency Operations head, nga posibli nga makab-ot na sa syudad ang 100% sa populasyon nga fully vaccinated na subay sa pagpaubos niini sa mas ubos nga alert level status.
Matud ni Garganera nga kini na ang panahon nga makabawi ang ekonomiya sa Cebu City sa pagbalik sa mga establisimento sa ilahang mga capacity human ang duha katuig nga ubos ang ilahang kita.
Apan gitataw sa opisyal nga bisan nga mas ‘relax’ na ang alert level status sa syudad kay gikinahanglan sa gihapon ang pagsul-ob ug face mask, ingon man nga gikinahanglan nga fully vaccinated ang mga tawo nga mutambong sa bisan unsa man nga indoor party.
Sigon pa, hatagan usab ug katungod ang mga establisimento nga magpahigayon ug ilahang kaugalingong guidelines alang sa kaayohan sa mga tawo ug sa ilahang negosyo.
Gihimug-atan ni Garganera nga ilahang hatagan ug guidelines ang mga barangay kapitan subay sa Alert Level 1 status sa syudad.
Nasayran nga bugtong ang Cebu City lang ang nadugang sa listahan sa mga area sa Central Visayas nga gipaubos sa Alert Level 1, kung diin una nang gipaubos ang Siquijor sa mas lu-ag nga quarantine classification.
