CEBU – Gibutyag ni Charles Kenneth Co, ang presidente sa Cebu Chamber of Commerce and Industry, nga maayo ra ang panglantaw sa sektor sa neosyo sa umaabot nga administrasyon.
Kini gumikan, tino pa ni Co nga kadaghanan sa mga botante sa nasud nagustohan ang programa ni presumptive president Ferdinand “Bongbong” Marcos Jr. ilabi na ang mensahe niini alang sa usa ka nagkahiusang nasod ug pagpapalambo sa Pilipinas nga mao usay gusto sa katawhan.
Malaumon kini nga adunay nindot nga kalamboan sa ilahang industriya tungod kung lantawon maayo man ang programa ni Marcos sa sektor sa negosyo.
Gihimug-atan man hinuon ni Co nga dakong hagit alang sa sunod nga administrasyon ang pagpatuman sa mga nagkadaiyang programa niini.
Subay niini, gihulagway usab ni Co ang ekonomiya sa outgoing administration ni Presidente Rodrigo Duterte nga usa ka kalampusan ilabi na ang Build-Build-Build program niini nga bisan paman taliwa sa pandemya, sa kadako sa gasto sa pagpalit sa mga bakuna nahatagan gihapon og gahin ang pagpalambo sa ekonomiya ug imprastraktura sa nasod.
