CEBU – Usa sa nahimong hisgutanan og nindot laagan karong panahona ang bag-ohay lang na-ablihan nga Carbon Sunday Market diin sa pangalan pa lang abli lang kini matag adlaw sa Dominggo.
Makita ang naasoyng lugar sa Carbon Market sa ML Quezon Boulevard, Barangay Ermita ning dakbayan sa Sugbo.
Apan, tungod daghan ang naka-uyon lakip na ang mga opisyal sa lokal nga kagamhanan sa Sugbo nagplano kini nga himuon kini nga matag adlaw.
Kini ang nahimong butyag ni Raquel Arce, ang acting market administrator sa Carbon Public Market, atol sa eksklusibong pakighinabi sa Bombo Radyo Cebu.
Nagkanayon si Arce nga nakauyon si Cebu City Mayor Mike Rama sa set-up sa naasoyng merkado ug gusto niini nga himuon kada-adlaw apan gikinahanglan pa kini og igong pagplano.
