Gilusad sa Cebu City Transportation Office (CCTO) karong adlawa, Martes, Agosto 5, ang hingpit nga pagpatuman sa motorcycle lane policy o ang “Bantal Motorcycle Lane Policy” human sa lima ka adlaw nga information campaign niini.
Gipahibalo ni CCTO Head Raquel Arce nga multahan og P1,000 ang unang kalapasan sa mga motorista nga masakpang molapas sa maong lagda.
Giklaro usab ni Arce nga ang maong “Motorcycle Lane” dili “exclusive” ra alang sa mga motorista, gumikan kay matod pa niya, aduna gihapoy mga 4-wheel nga tugutang makasulod sa Motorcycle Lane kung hinay ang gikusgon sa pagpadagan niini.
Nasayran nga pipila ka mga motorista ang naobserbahan nga nagbiyahe gihapon gawas sa gitudlo nga lane niadtong Lunes, Agosto 3, samtang nagpadayon pa ang kampanya.
Bisan pa niini, gibutang gihapon ang mgablue road markings ug mga traffic signs aron magiyahan ang mga lumalabay sa maong BANTAL Road.
Samtang, ubos sa Oplan BanTal: Discipline Zone nga naglangkob sa mga barangay sa Banilad, Talamban, ug Pit-os, ang tanang motorsiklo gimandoan nga magpabilin sa pinakatuo nga lane gawas kung kini moliko o molikay sa mga babag sa dalan.
