CEBU – Naka-half mast karun ang bandera sa Pilipinas nga anaa sa compound sa Cebu Police Provincial Office (CPPO) sa Barangay Lahug, dakbayan sa Sugbo.
Kini isip paghatag ug pahasubo sa kamatayon ni Police Staff Sergeant Careby Clyde Alinsug sa Consolacion Police Station.
Gibutyag ni CPPO Director Police Colonel Engelbert Soriano nga gawas sa regular benefits gikan sa PNP, ang pamilya sa naasoy nga pulis ang makadawat usab ug P100,000 gikan sa Public Safety Mutual Fund sa kapulisan, lain usab nga P50,000 isip in-house aid nga magagikan sa contribusyon sa mga personnel sa CPPO.
Samtang, gisiguro ni Soriano nga magpadayon ang imbestigasyon sa kapulisan sa nahitabong kamatayon ni Alinsug ug ang pagsuta sa rason nganong nagtago-tago ang suspek nga si Reynaldo Ydil sa Sitio Tarcom, Barangay Lahug, diin kini usab napatay atol sa follow-up operation, human sa pagpusil patay sa pulis sa Barangay Casili, lungsod sa Consolacion.
Nasayran nga usa ka nurse si Alinsug ug milakip sa PNP niadtong 2012, diin niadto pa nadestino na kini sa Consolacion Police Station.
