Mayor Rama nipagawas og executive order, full F2F classes gitugotan na sa dakbayan sa Sugbo

CEBU – Gitugotan na ang full face-to-face (F2F) classes sa tanang educational institutions sa dakbayan sa Sugbo.

Kini human niluwat si Cebu City Mayor Michael Rama og Executive Order No. 174 nga nag-ulohang “Order Balik Eskwela, Pabakuna Bonanza, ug Ekonomiya Isaka.”

Tungod sa kataas sa vaccination rate sa dakbayan, gilantaw sa mayor nga mapuslanon ang pagbalik sa F2F classes sa mga tunghaan basta hingpit nang nabakunahan ang mga magtutudlo, estudyante, ug ginikanan.

Ubos sa EO 174, gitugotan ang tanang educational ug training institutions nga naglihok sulod sa dakbayan sa Sugbo sa pagpahigayon og face-to-face nga klase sa tanang lebel hangtod sa full ug safe accommodation capacity.