CEBU – Nangulo sila si Mayor Junard “Ahong” Chan ug DENR-Environmental Management Bureau Director William Cuñado sa inagurasyon ug ground-breaking sa Vic Metal Fabrication and Environmental Services Incorporated, sa sitio Soong, barangay Mactan, niadtong Huwebes, Hulyo 28.
Sulod sa usa ka ektarya nga compound sa kompanya mao ang Waste Management Facility (WMF) ug ang umaabot nga MRF Training Center.
Gidayeg ni Dir. Cuñado ang WMF sa pagtabang sa dakbayan sa Lapu-Lapu ug mga pribadong kompaniya sa siyudad, nga nahimong tourist destination sa pagdumala sa ilang mga basura ug hugaw.
Samtang nagkanayon si Victoriano Ocon, presidente ug CEO sa Vic Metal Fabrication, nga solid ug liquid waste ra ang ilang gidawat gikan sa dakbayan sa Lapu-Lapu.
Apan kon magsugod na sila sa ilang training center, hinaot nga sa 2nd quarter sa sunod tuig, bukas na sila sa tanang kompaniya gawas sa dakbayan sa Lapu-Lapu ug ubang LGUs ug andam usab kini nga ibaligya ang waste management system sa bisan kinsang interesado nga LGU.
Nasayran nga nakahimo ang WMF sa pagproseso sa 220 ka toneladang solid waste matag adlaw.
