CEBU – Gitataw ni Dr. Ilya Tac-an, ang human immunodeficiency virus (HIV) coordinator sa City health, nga maong daghan ang kaso sa HIV sa dakbayan sa Sugbo gumikan daghan ang testing center hinungdan nga daghan ang nagpa-test ug daghan usab ang nagpositibo sa maong sakit.
Kung itandi sa ubang lugar, gamay lang ang testing center kompara sa syudad.
Matod pa ni Dra. Tac-an nga sagad hinungdan sa pagpositibo sa HIV mao ang pagpulipuli sa dagom ilabi na sa injecting drug users ug ang men-to-men sex o lalaki sa lalaki nga pakighilawas apan mamahimo usab kini sa babaye sa lalaki ilabi na sa kadtong magpracktis og anal sex ug kini gumikan na usab sa ka-ubos sa condom usage dili lang sa Sugbo kundi lukop nasod.
Samtang gidugang sa doctora nga wala sila magkuwang sa paghatag og impormasyon sa publiko kabahin sa maong sakit ug unsaon aron pakigbatokan kini.
Gani, aduna silay tulo ka channel alang sa information drive diin lakip niini ang school-based, barangay-based ug online.
Nasayran nga adunay tulo ka paagi aron mataptan sa maong sakit sama nalang sa dili luwas nga pakighilawas, blood-to blood transmission ug mother-to-child transmission atol sa pagpanganak ug pagpatotoy kung infected ang usa ka inahan.
