CEBU – Kasamtangang gisusi sa kapulisan sa dakbayan sa Sugbo kon nalambigit ba usab sa mga insidente sa pagpamusil sa dakbayan ang miangkon nga hitman nga nasikop niadtong Oktubre 8, 2022 atol sa anti-illegal drug operation sa Barangay Sambag 2, dakbayan sa Sugbo.
Matod ni Police Lieutenant Colonel Wilbert Parilla, deputy director for administration sa Cebu City Police Office, nga kini human si Ruel Dayap, 34, usa ka giingong hitman, nasikop uban sa giingong kauban niini nga si Rosela Ansag, 42, tungod sa paghupot og 10 gramos sa gituohang shabu nga mobalor og P68,000 ug usa ka .357 revolver sa Barangay Sambag 2.
Human si Dayap ug Ansag usa sa 68 ka mga indibidwal nga nasikop sa usa ka adlaw nga simultaneous Anti-Criminality and Law Enforcement Operations nga gipahigayon niadtong Sabado, Oktubre 8.
Sa kinatibuk-an, mokabat sa 387 gramos nga shabu ang nasakmit sa kapolisan nga mobalor og P2.6 milyones.
