CENTRAL VISAYAS- Mipasalig si Police Brigadier General Arnold Abad, bag-ong hepe sa PRO-7, sa lig-on nga kooperasyon ug sa pagpalig-on sa kalinaw ug seguridad sa rehiyon human sa iyang opisyal nga pagkapuli isip regional director sa Police Regional Office 7 (PRO-7) sa turnover ceremony sa han-ay sa Philippine National Police nga gipahigayon sa Camp Sergio Osmeña, Sr., Dakbayan sa Sugbo, gahapon Abril 16, 2026.
Gipulihan ni Abad si Police Brigadier General Redrico Maranan nga gibalhin isip direktor sa Philippine National Police Academy (PNPA).
Sa iyang mensahe, gipasiugda ni Abad ang pagdawat sa responsibilidad uban ang pagkamapaubsanon ug dedikasyon sa bag-ong posisyon.
Matud pa niya, gidawat niya ang papel isip Acting Regional Director sa PRO-7 uban sa dakong pagbati sa pagpaubos ug katungdanan, samtang giila usab niya ang mga hagit ug taas nga ekspektasyon sa katawhan sa Central Visayas.
Gipasalig usab niya sa publiko nga magpadayon ang PRO-7 sa pagtuman sa mandato niini sa pagpanalipod ug pagserbisyo sa katawhan.
Dugang pa, ang pagmintinar sa kalinaw ug kahusay sa rehiyon magdepende sa lig-on nga kooperasyon tali sa kapolisan ug komunidad.
Nagpahayag siya nga uban sa suporta sa liderato ug panaghiusa sa katawhan, mapadayon ang PRO-7 isip luwas nga dapit alang sa pagpuyo, pagtrabaho, ug pagpanginabuhi.
