CEBU – Nasakmit sa mga operatiba sa Criminal Investigation and Detection Group (CIDG) Lapu-Lapu City Field Unit, ang giant clam shell o taklobo nga mokabat sa P30 milyones, nga gipangulohan ni Police Captain Nigel Sanoy sa Sitio Tukdaw, Barangay Bongoyan, lungsod sa Borbon, amihanang Sugbo.
Ang buy-bust operation hiniusang gihimo sa 300th Air Intelligence Security Wing sa Philippine Air Force, Naval Forces Central ug Bureau of Fisheries and Aquatic Resources.
Nasikop sa mga otoridad ang namaligya og kabibe nga si Anecito Baliguat Pogado, 46, mag-uuma sa nahisgutang lugar.
Moabot sa 120 ka higanteng kabibe nga motimbang og duha ka tonelada nga mobalor og P30 milyones ang nasakmit atol sa operasyon.
Nasayran nga ang giant clams nga walay sulod ibaligya sa gawas sa nasud sa tag P15,000 matag kilo.
Ang higanteng clam shells mahimong gamiton isip mga dayandayan, alahas, mga gamit sa lamesa ug bisan sa tiling sa salog.
Mag-atubang ang suspek og kasong kalapasan sa Republic Act 8550 Philippine Fisheries Code of 1998 nga gi-amendar sa Republic Act 10654.
