CEBU – Mohangyo ang kapolisan nga ipa-autopsy ang lawas sa usa ka massage therapist nga gikatahong nahulog o miambak gikan sa ika-38 nga andana sa usa ka hotel nga nahimutang duol sa Fuente Osmeña Circle sa dakbayan sa Sugbo niadtong Lunes, Oktubre 24.
Kini aron masusi kon aduna bay foul play sa kamatayon sa biktima, kinsa namatikdan kaniadto sa iyang mga kauban sa trabaho nga problemado ug nadisturbo usa ka adlaw sa wala pa ang insidente, matod ni Police Lieutenant Colonel Wilbert Parilla, deputy director for administration sa Cebu City Police Office.
Dugang pa ni Parilla nga aduna na silay pangalan sa biktima pinaagi sa nakuhang identification card apan nagdumili sila sa pagbutyag sa iyang pagkatawo sa pagkakaron.
Sa pagkutlo sa impormasyon sa mga imbestigador sa Abellana police, si Parilla niingon nga ang biktima nakit-an sulod sa hotel mga alas 5 sa buntag niadtong Lunes, Oktubre 24, ug nisulod kini sa elevator paingon sa ikasiyam nga andana pipila ka gutlo sa wala pa ang insidente misakay na usab siya sa laing elevator ug miadto sa ika-37 nga andana.
Matod sa kapulisan nga posibleng miadto ang biktima sa 38th floor diin napalgan ang iyang gituohang mga butang lakip na ang iyang bag, pares sa tsinelas, ug usa ka tumbler.
