Mitubag si Defense Secretary Gilberto Teodoro Jr. sa panawagan ni Chinese Foreign Minister Wang Yi—kinsa nag-akusar nga dili tinuod ang mga pamahayag sa Pilipinas—nga angay magpugong ang nasud sa ilang mga pamahayag ug lihok kalabot sa West Philippine Sea.
Matod ni Teodoro, ang kasamtangang mga lihok sa Pilipinas nagpakita sa kamatuoran, ug dili angay tawgon nga mga bakakon ang mga Pilipino.
Dugang pa niya, dili angay nga diktahan sa China ang Pilipinas kon unsaon pagpadayag ang kamatuoran, ilabi na nga ang mga kamatuoran natukod na diha sa desisyon sa arbitral tribunal.
Ang mga pamahayag ni Teodoro gihimo isip tubag sa pagpakighinabi sa telepono tali kang Wang ug Foreign Affairs Secretary Ma. Theresa Lazaro. Atol niini, giawhag ni Wang ang Pilipinas nga ilhon ang “One China” policy ug mag-amping sa ilang mga pulong ug lihok may kalabotan sa isyu sa West Philippine Sea.
