CEBU – Gawas sa ATM scam ug budol-budol, gipaalerto usab sa kapulisan sa dakbayan sa Sugbo ang publiko batok sa mga tawo nga nagpakaaron-ingnong polis nga mangilad sa ilang mga biktima ug mangawat sa ilang personal nga impormasyon.
Nipagawas og hugot nga pahimangno si Police Colonel Ireneo Dalogdog, hepe sa Cebu City Police Office (CCPO), karung adlawa Domingo, Nobiyembre 13, human sila makadawat og impormasyon sa social media nga adunay naggamit sa pangalan sa ilang buhatan nga Camp Sotero Cabahug aron mangilad.
Sa usa ka post nga nikatap sa social media, usa ka babaye nga biktima niingon nga nakadawat siya og tawag gikan sa usa ka ahensya sa gobyerno nga nagpahibalo kaniya nga siya gi-blacklist tungod sa giingong pakete nga adunay mga ilegal nga dokumento.
Pipila ka minuto ang milabay, gikatahong nakadawat siya og tawag gikan sa usa ka babaye nga nagpailang sakop sa Philippine National Police sa Sugbo, ang maong caller nihangyo kon mahimo ba silang mag-conference pinaagi sa Skype human siya niingon nga dili siya makaadto sa Sugbo aron personal nga magpa-blotter report.
Atol sa ilang Skype meeting, ang biktima niingon nga iyang nakita ang babaye nga nagsul-ob og “police uniform.” Ang babaye niangkon usab nga nakig-estorya siya gikan sa headquarters sa Cebu City Police Office (CCPO) nga nahimutang sa Camp Sotero Cabahug.
Ang wala pa mailhi nga “scammer” giingong nihangyo sa biktima nga isaysay ang insidente may kalabotan sa pakete samtang girekord niya ang tanan sa video, ug nibutyag nga ang video magsilbi na nga iyang video complaint.
Human sa ilang panag-estorya, gihatagan sa biktima ang scammer og mga kopya sa iyang driver’s license, lakip na ang iyang personal data.
Nasurpresa siya pagkaugma nga nahibaw-an nga mo-withdraw og P29, 700 gikan sa iyang bank account.
Nakadawat siya og abiso gikan sa iyang bangko aron ma-verify ang online nga gikataho nga iyang gihimo.
Apan, wala ma-release ang kwarta human siya nipahibalo sa iyang bangko nga wala siya mo-withdraw.
Matod ni Dalogdog nga ila karong gisusi ang insidente.
Apan samtang naningkamot sila sa pag-ila sa gitumbok nga mga sad-an, gihangyo ni Dalogdog ang publiko nga i-verify ang pagkatawo sa mga tawo nga ilang giatubang ug dili ihatag ang ilang datos sa bisan kinsa.
Gihangyo usab ni Dalogdog ang publiko nga dili i-click ang mga link nga gipadala pinaagi sa text messages o online chat tungod kay ang mga hacker ug scammer nahimong teknolohiya karon.
Matod niya nga ang kakuryuso mahimong magbutang sa bisan kinsa sa peligro tungod kay kini mahimong mosangpot sa pagpangawat sa personal nga impormasyon.
