Masaligon si National Bureau of Investigation (NBI) Director Melvin Matibag nga mokunhod ug sa ulahi mawala ang negatibong impluwensya sa social media sa mga batan-on kung matuman sa Meta ang mga saad niini.
Matod ni Matibag, mabungahon ang ilang miting uban sa mga opisyal sa Meta sa Singapore, diin ilang gihisgutan ang mga insidente sa negatibong paggamit sa social media, ilabina sa mga batan-on.
Lakip sa gihisgutan ang mga lakang batok sa pagpakaylap og peke nga balita ug uban pang makadaot nga impormasyon.
Matod pa ni Matibag, mas dali nang mailhan ug masubay ang mga nagpakaylap og fake news kung ipatuman sa Meta ang mga gihisgotang lakang.
Gihatagan usab og pagtagad sa NBI ang mga groomer nga naggamit sa social media aron maimpluwensyahan ang mga batan-on sa paghimo og lain-laing matang sa krimen.
Gilauman sa NBI nga ang maong miting mahimong sinugdanan sa mas lig-on nga pakigtambayayong sa Meta aron mapanalipdan ang mga batan-on batok sa mga hulga sa social media.
