CEBU-Gidunggab ug gipatay sa usa ka 27-anyos nga lalaki ang iyang 39-anyos nga mahuyang nga uyab, tungod sa giingong pagtapos sa ilang relasyon.
Gidunggab ug gisamaran usab sa mamumuno ang inahan sa biktima, kinsa nisuway sa pagpugong sa suspek sulod sa balay sa biktima sa Barangay Bacayan, dakbayan sa Sugbo pasado alas 7 sa gabii bisperas sa Bag-ong Tuig, Disyembre 31, 2022.
Giila ni Police Major Alvin Llamedo, hepe sa Talamban Police Station, ang namatay nga biktima nga si Alain Paul Englis ug ang naangol nga inahan niini nga si Emma Englis, 70.
Ang ‘hubog’ nga suspek nga si Jumbe Olarita sa Barangay Cabancalan sa dakbayan sa Mandaue nadakpan sa mga estambay human misuway og eskapo sa maong dapit.
Gitanggong ang suspek sa Talamban Police Station ug mag-atubang og reklamong Frustrated Homicide and Homicide.
Matod niya nga si Olarita, ang suspek, migamit og otso pulgadas nga kitchen knife ug giingong adunay “intent to murder” ang biktima.
Sa inisyal nga imbestigasyon nagpakita nga si Olarita giingong nidunggab kang Alain sa makadaghang higayon, ug dayon gidunggab ang inahan sa naulahi, kinsa misulay lang sa pagpahunong kanila sa pag-away.
Gidala si Alain sa duol nga tambalanan, apan gideklarar kini nga dead on arrival sa nag-atiman nga mananambal.
Samtang ang iyang inahan nga si Emma, kasamtangang anaa sa tambalanan nga nagpaalim sa mga samad dinunggaban nga iyang nahiaguman gumikan sa pagdunggab.
