LAPU-LAPU CITY-Nagplano ang Lapu-Lapu City Police Office (LCPO) nga maghimo og cybercrime units ilabi na nga gilusad na sa kagamhanan sa dakbayan ang Paleng-QR PH program sa mga merkado niini.
Gitataw ni Police Colonel Elmer Lim, city director sa LCPO nga kinahanglan una nilang i-capacitate o bansayon ang ilang mga imbestigador bahin sa cybercrimes ug unsaon pag-atubang niini.
Gumikan niini, makig-alayon sila sa Cybercrime Unit sa paghimo og pagbansay-bansay ug paghatag og kapasidad sa ilang mga imbestigador sa maong mga matang sa krimen.
Matud pa ni Lim nga nagplano sila nga magbukas og cybercrime unit sa LCPO ug sa tanan nilang substation, aron dili na kinahanglang mobiyahe pa ang mga biktima sa rehiyonal nga buhatan sa Cybercrime Unit sa Sudlon, Lahug sa dakbayan sa Sugbo.
Ang plano sa kadagkoan sa LCPO gihimo aron sila makahimo sa pagdumala ug pagpugong sa cybercrimes nga mahitabo sa mga transaksyon sa mga merkado publiko, traysikol ug jeepney.
