MANDAUE CITY-Mohimo og imbestigasyon ang mga awtoridad sa fetus nga napalgang naglutaw sa septic pumper truck sa dakbayan sa Mandaue Biyernes sa buntag, Pebrero 24, 2023.
Gibutyag ni Patrolman Jemson Tolin sa Mandaue City Police Office (MCPO) Station 1 sa Barangay Centro, case investigator, nga base sa inisyal nga mga taho, posibleng gikuha ang fetus sa usa sa mga portable toilet septic tank sa Cebu International Convention Center ( CICC).
Matod ni Tolin nga ang insidente gi-report kanila mga alas 11:30 sa buntag sa mga service cleaner nga mibalhin sa basura ngadto sa septic truck.
Ang fetus nadiskubrehan sa drayber sa trak nga si Rowel Moreno, lumad nga taga Barangay Upper Tabok sa dakbayan sa Mandaue kinsa unang nasayop niini nga patay nga mananap.
Gitawagan dayon ni Moreno ang Mandaue City Disaster Risk Reduction and Management Office (MCDRRMO) alang sa tabang.
Ang fetus nga giila nga usa ka masuso nga babaye, daling gidala sa Mandaue City District Hospital ug gideklarar nga patay na sa nag-atiman nga nurse.
Matod ni Tolin nga ilang imbestigahon kon mahimo bang ilabay ang fetus pipila ka adlaw sa wala pa kini makit-i. ug adunay posibilidad nga ang tag-iya sa fetus nagpuyo sa evacuation area sa CICC.
