CEBU PROVINCE-Gisuportahan sa Department of Education Central Visayas ang lakang sa ginikanan sa pagpa-autopsy sa patay nga lawas sa 12-anyos nga tinun-an sa Badian National High School.
Gibutyag ni Dr. Salustiano Jimenez, ang regional director sa DepEd 7, nga mimando na kini sa school’s division superintendent nga palagman ang imbestigasyon sa nahitabo ug mag-sumitir ug incident report.
Matud pa, mas maayo nga midangop ang ginikanan sa National Bureau of Investigation 7 arun nga ipa-autopsy ang bata arun nga maklaro ang hinungdan sa pagkamatay sa maong tinun-an.
Samtang, gipahibalo usab ni Dr. Jimenez nga nag-tinabangay na usab ang mga magtutudlo, ingon man ang kadagkuan sa school’s division arun nga makahatag ug ginagmay nga hinabang alang sa pamilya sa biktima.
Kahinumdoman nga namatay ang naasoy nga tinun-an human nga giingong nabiktima sa ‘bullying’.
Basi sa mga nakasaksi, giingong gilabayan ug bola ang biktima sa lain pang tinun-an ug na-igo kini sa dughan, natumba ug misuka ug dugo.
Giingong milagom ang biktima ug gihilantan maong gidala kini sa tambalanan apan wala magdugay kay nakutlo-an kini sa iyahang kinabuhi.
Basi sa death certificate sa bata, hypoxic shock ug posibli nga cardiopulmonary arrest ang gikamatay sa bata.
