CEBU PROVINCE-Malaumon karun si Cebu Provincial Governor Gwendolyn Garcia nga daghan pang mga oportunidad sa turismo ug pagpalambo sa ekonomiya human nga gi-ablihan na ang runway sa Bantayan Island Airport.
Gipangulohan ni Governor Garcia kauban nila ni Mactan Cebu International Airport General Manager Julius Neri, Department of Transportation Undersecretary Roberto Lim ug ang director sa Civil Aviation Authority of the Philippines Captain Manuel Tamayo, ang pag-abli sa gipatas-an ug gipalapdan nga runway sa naasoy nga tugpahanan.
Ang maong runway adunay gilapdon nga 30 metros ug gitas-on nga 1.2 kilometros nga maka-akomodar ug commercial flights paingon sa maong isla sugod sa Abril.
Matud ni Garcia nga posibli pa nga mapatas-an ang runway ngadto sa 1.4 kilometros.
Plano usab sa gobernadora nga mupalit ug yuta ang Kapitolyo duol sa maong airport alang sa katukoran sa General Aviation nga tunghaan.
Kahinumdoman nga gi-ablihan ang maong airport niadtong 2019 apan wala mahimong operational gumikan kay gikinahanglan pang palapdan ang runway niini.
