CEBU CITY-Migawas nga over-all champion ang Bureau of Fire Protection Central Visayas (BFP-7) sa bag-o lang natapos nga National Fire Olympics (NFO) 2023, nga gipahigayon sa South Road Properties (SRP) gikan niadtong Marso 16 hangtud sa Marso 17 ning kasamtangan nga tuig.
Gipahibalo ni SFO2 Wendel Villanueva, ang tigpamaba sa Cebu City Fire Office, nga gisalmotan ang maong aktibidad sa 17 ka mga rehiyon tibuok nasud isip usa sa mga kalihokan sa National Fire Prevention Month.
Matud pa, sa maong kalihokan, gipakita sa mga bombero ang ilahang mga kapabilidad sa paglikay ug pagtubag sa sunog.
Nagkadaiyang kategorya ang nadaugan sa BFP-7, lakip na niini ang fire ground search and rescue, tower blitz, ingon man ang BFP Bands Musiklaban.
Gihimug-atan ni Villanueva nga hilabihan ang ilahang kalipay sa maong kadaugan sa kabomberohan sa rehiyon 7 kung diin susamang nabayran ang ilahang kahago sa pagpangandam sa naasoy nga aktibidad.
