MANDAUE CITY-Ipadayon sa kagamhanan sa dakbayan sa Mandaue ang ilahang plano nga magtukod ug bag-ong government center sa luna diin nagbarug ang Cebu International Convention Center (CICC).
Kini ang nasabotan atol sa tigom nga gipatawag ni Cebu Provincial Governor Gwendolyn Garcia kauban si Mandaue City Mayor Jonas Cortes ug kadagkuan sa Commission on Audit (COA).
Gibutyag ni Governor Garcia nga samtang nagpaabot pa sila sa pag-reappraise sa COA sa maong propridad sa balor niini, magpadayon ang proyekto nga government center sa maong dakbayan.
Kahinumdoman nga ang CICC kay gitukod alang sa 12th ASEAN Summit ug 2nd East Asian Summit niadtong tuig 2007, apan gibaligya kini sa nakalabay nga administrasyon sa dakbayan sa Mandaue sa kantidad nga P300 million.
Sa pagbalik ni Governor Garcia sa katungdanan niadtong 2019 nasayran niini nga ang pagbaligya sa CICC wala mipa-ubos sa insakto nga public bidding sanglit ang transaksyon kay walay pagtugot gikan sa COA ug nagkasabot ang lalawigan ug Mandaue City nga bayaran sa dakbayan ang maong luna.
Kung mas taas ang reappraise value sa COA itandi sa orihinal nga presyo sa pagbaligya niini, matud ni Mayor Jonas Cortes nga andam ang dakbayan nga mubayad sa balansi ngadto sa Kapitolyo.
