CEBU CITY-Mikabat sa kapin 200 ka mga police personnel ang gipang-deploy alang sa mga aktibidad karung adlawa sa Cebu City subay sa Independence Day 2023 celebration.
Sa pakighinabi sa Bombo Radyo Cebu kang Police Colonel Ireneo Dalogdog, ang director sa Cebu City Police Office, gibutyag niini nga pasado alas 2 pa lang kaganihang kadlawon kay naka-deploy na ang mga pulis alang sa tibuok adlaw nga selebrasyon.
Matud ni Dalogdog nga ibutang sa nagkadaiyang venue sa selebrasyon ang kapulisan sukad pa kaganihang alas 5 sa buntag kung diin gipahigayon ang Santos nga Misa sa Fuente Osmeña circle, gisundan kini ug Civic Military Parade, ingon man ang wreath-laying ug flag raising ceremony sa Plaza Independencia.
Gi-monitor usab sa kapulisan ang posibli nga pagtumaw sa mga raliyista alang sa pagpahigayon ug demonstrasyon ilabi na sa dalan Colon.
Samtang, gipadayag usab police diirector nga padayon ang ilahang gihimo nga aksyon isip tubag sa marching order ni Cebu City Mayor Michael Rama nga sugod karung adlawa, June 12 kay gikinahanglan wala na’y mga libud-suroy, nangatulog sa kadalanan, ingon man nga mahunong na ang bandalismo tibuok dakbayan.
