PROVINCE OF CEBU-Gitinguha ni Consul General of China Zang Zhen nga mapalig-on ang relasyon sa lalawigan sa Sugbo ug probinsiya sa Fujian sa nasud nga China sa natad sa turismo, trade ug investments.
Kini ang gipadayag sa Consul atol na sa iyahang pagbisita sa buhatan ni Governor Garcia.
Gihangop ni Governor Garcia ang maong plano sa Consul ug gihingusgan ang importansya sa pag-abli ug direkta nga flight gikan sa Sugbo paingon sa Fujian ug vice versa.
Matud pa sa gobernadora nga ang maong lakang kay makatabang sa duha ka lalawigan sa pagpalambo sa tagsa-tagsa ka ekonomiya pinaagi sa turismo, trade ug investments.
Gawas sa malipayon si Governor Garcia nga babaye usab ang Consul General sa China, mipaambit usab kini ug pasalamat sa dugay nga panahon nga pakig-alyansa sa nasud nga China sa probinsiya sa Sugbo.
Mipahayag usab si Zhen nga abli sila sa mga sugyot alang sa kalamboan ug padayon nga pakigtambayayong sa duha ka mga probinsiya.
Dugang pa, wala kalimti sa gobernadora ang pagpasalamat sa silingang nasud ilabi na sa pagtubag niini sa panginahanglan sa probinsiya sa Sugbo panahon sa COVID-19 ug bagyong Odette.
Kahinumdoman nga ang probinsiya sa Sugbo aduna na’y natukod nga relasyon sa nagkalain-lain nga probinsiya sa China.
Sa pagkakarun, padayon ang mga plano sa duha ka lider alang sa kalamboan sa ilahang mga probinsiya.
