Gi-rekomendar sa Cebu City Legal Office ang temporaryong dili usa pag-bayad alang sa mga properties daplin sa F. Vestil Street nga apektado sa proyekto sa Cebu Bus Rapid Transit (BRT) samtang wala pa giklaro sa Department of Transportation (DOTr) kung gikinahanglan pa ba gihapon ang maong mga propiedad ubos sa final nga ruta o alignment.
Matod sa legal office, ang pagsalikway sa City Council sa gisugyot nga kausaban sa ruta wala nagpasabot nga nawala ang awtoridad sa DOTr sa proyekto o ang katungod sa mga apektadong tag-iya nga makadawat og hustong bayad inay gipasiugda usab niini nga ang maong rekomendasyon usa lamang ka tambag ug dili pinal nga desisyon.
Sa usa ka legal nga opinyon, gitambagan sa City Legal Office ang CBRT Project Management Office (CBRT-PMO) nga makig-alayon una sa DOTr sa dili pa ipadayon ang proseso sa pagbayad ngadto sa mga tag-iya sa kabtangan nga maapektuhan sa proyekto.
Gi-isyu kini nga opinyon agi’g tubag sa hangyo ni CBRT-PMO Head Ma. Concepcion Encabo mahitungod sa mga sunod nga lakang sa pag-proseso sa bayad alang sa mga kabtangan nga kuhaon alang sa proyekto.
Gi-endorso usab ni Encabo ang maong legal nga opinyon ngadto kang Konsehal Winston Pepito, ang chairman sa Committee on Transportation sa City Council, niadtong Setyembre 17, diin gi-endorso ni Pepito ngadto sa konseho niadtong Setyembre 21 alang sa ilang kasayuran ug giya.
Matod sa City Legal Office, ang resolusyon sa konseho nga giaprobahan niadtong Hulyo 3 nagrepresentar sa opisyal nga baruganan sa Sangguniang Panlungsod, apan wala kini gahom o epekto sa balaod nga makakanselar gayod sa gisugyot nga pag-usab sa ruta sa BRT.
Gipasabot niini nga ang awtoridad sa pagdeterminar sa ruta ug pagpatuman sa proyekto nga BRT anaa sa DOTr, subay sa mga angay nga balaod ug mga kondisyon sa pondo, gumikan mahimong dawaton o dili sa nasudnong ahensya ang baruganan sa City Council, girekomendar sa legal office nga makig-alayon ang CBRT-PMO sa DOTr mahitungod sa pagbayad sa mga apektadong kabtangan. via Bombo Fonz Cabrillos
