TALISAY CITY, CEBU-Nakigsabot ang Metropolitan Cebu Water District (MCWD) sa bulk water supply sa usa ka pribadong kompanya aron mahatagan og dugang suplay sa tubig ang mga residente sa Talisay.
Sa usa ka pamahayag, ang water district nagkanayon nga ang 25 ka tuig nga panagtambayayong nagtumong sa paghatod sa dugang inadlaw nga suplay nga 15,000 ngadto sa 50,000 cubic meters, nga gipalit sa P58 matag cubic meter, alang lamang sa mga konsumidor sa Talisay City.
Ang MCWD nipirma sa ilang kasabutan uban sa joint venture sa Watermatic International Ltd. ug Tubig Pilipinas Group Inc. sa usa ka panagtapok nga gipahigayon sa buhatan ni first district Rep. Rhea Gullas nga nahimutang sa lungsod sa Minglanilla niadtong Martes, Agosto 8, 2023.
Dugang pa, nga ang bulk water supplier gikatakda nga magsugod sa pag-apod-apod sa tubig sulod sa 24 ka bulan gikan sa pag-isyu sa Notice to Proceed.
Ubos sa kasabutan, ang Watermark ang responsable sa pagproseso sa sobra nga tubig o ang runoff nga nakolekta gikan sa Jaclupan weir.
Dugang pa, ang mga pasilidad nga itukod ug gamiton sa kompanya itugyan ngadto sa MCWD sa katapusan sa 25 ka tuig nga kontrata o kung ang gikontrata nga volume nga 136,875,000 cubic meters nahatag na o kung unsa ang mas sayo, o mas sayo kay sa 15 ka tuig nga panahon.
