CEBU CITY-Nakatilaw og pagpanapat ang mga kanhi ka-relasyon ni Simeon “Gabro” Gabutero, kinsang nagpatay sa linuog nga kamatayon sa biktima nga 19-anyos nga si Rhea Mae Tocmo.
Sa pag-imbistigar sa mga kapulisan, diin gipanguluhan ni Police Colonel Ireneo Dalogdog, ang City Director sa Cebu City Police Office, nga niingon ang hinungdan sa panagbulag niini sa mga kanhi ka-relasyon mahitungod sa iyahang bati nga batasan.
Atol sa ‘background investigation’ nga gipahigayon sa mga kapulisan ngadto sa biktima, giingon nga duha sa mga kanhi ka-relasyon sa suspek, saksi ug nakasinati sa pagpanapat ug bati nga batasan sa suspek nga si “Gabro”.
Dugang pa niini, gisumbag sa tiyan nga bahin ang babaye samtang nagsabak pa kini og bata ug gigukod usab og sundang sa suspek.
Gidugang pa ni Dalogdog nga adunay ‘tendency’ nga ang suspek makabuhat sa pagpatay tungod sa hilabihan nga pag-selos ngadto sa iyahang mga ka-relasyon tungod base sa natala nga mga impormasyon sa mga kapulisan nga manapat ang maong suspek sa dihang mahilabihan na kini sa iyahang selos.
Subay niini, nag-atubang na sa kasong pagpatay si Gabutero gumikan sa mga nakuha nga ebidensya batok kaniya nga adunay kalambigitan sa kamatayon ni Rhea Mae Tocmo kinsang napalgan kaniadtong Hulyo 16, 2023 nga gisulod sa karton.
