CEBU CITY-Gihingusgan karun sa kagamhanan sa dakbayan sa Sugbo ang declogging sa mga drainage lines ug dredging sa mga kasapaan arun nga ma-menosan ang baha sa kadalanan ilabi na karun nga nagsugod na usab ang uwan.
Usa kini sa gimando ni Cebu City Mayor Michael Rama sa Task Force Gubat sa Baha sa wala pa kini molarga paingon sa Estados Unidos.
Gibutyag ni Jefferson Omandam, ang Task Force Gubat sa Baha Acting Co-Chairman, nga ilahang nakita ang mga barado nga kanal ang dakong hinungdan sa pagbaha sa urban areas sa dakbayan.
Gipahigayon ang maong declogging ug dredging sa Barangay Tinago, Parian, T.Padilla, ug Tejero, diin mikabat sa 44 ka tonelado nga basura ang nakolekta sa task force ug mga volunteers.
Sa maong aktibidad kay milakip usab ang kapin 500 ka mga kawani sa City Hall ang mitabang, diin nadiskobrihan ang gamay nga sapa sa dalan Zulueta nga natabonan na og daghang mga basura ug mga tanom sa pila na katuig.
Padayon karun ang koordinasyon tali sa task force ug sa Department of Engineering and Public Works (DEPW) arun nga ipadayon ang mga declogging ug dredging operation sa uban pang mga lugar.
