CEBU-APatay ang usa ka 34 anyos nga byudo sa nahitabong pagpamusil sa Sitio Silangan 1, Barangay Tinago sa dakbayan sa Sugbo alas 9:00 sa Domingo sa gabii Septyembre 3, 2023.
Ang biktima giila nga si Harris Mohammad, 34, nga nag puyo sa maong lugar nga nakaangkon og samad pinusilan sa luyong bahin sa ulo niini nga miresulta sa iyang hinanali nga kamatayon.
Sa imbestigasyon sa Waterfront police station 3 nasuta nga samtang nagduwa og computer ang biktima sa sulod sa computer shop uban sa mga batan-on kalit lang nga misulod ang suspetsado nga ginganlan nga si Justine Arquisal nga taga Zapanta Barangay Tejero sa dakbayan sa Sugbo ug dayong pamusil.
Sa pikas bahin, anaa sa talandugon nga kahimtang sa usa ka negosyante human kini pusila sa wala pa mailhing lalake sa dalan Victoria, Barangay Tabunok dakbayan sa Talisay alas 3:00 sa Domingo sa hapon,Setyembre 3, 2023.
Ang biktima giila nga si Alice Caballes nga nag puyo sa maong lugar.
Matod sa ugangan sa biktima nga si Vanessa nga samtang iyang gihingot-an si Alice kalit nga naabot ang riding in tandem ug ang angkas ang mikanaog sa motor ug dayong pamusil.
Samtang, nagtingkagol na karon sa custodial facility sa Police Station 6 sa Mandaue City Police Office MCPO ang suspetsado sa pagpusil sa usa ka kanhi kapitan sa Brgy Casili dakbayan sa Mandaue pasado alas 8 sa Lunes sa gabie.
Ang dinakpang suspek nailhan nga si Victor Andales Bacus alyas Bobong 36-anyos nga molopyo sa Upper Casili Brgy Casili dakbayan sa Mandaue.
Si Bacus maoy gitumbok nga mipusil sa kanhi kapitan sa Brgy Casili nga si Jamie Maureal 55-anyos nga silingan ra usab sa suspetsado.//
Naigo si Maureal sa may liog hinungdan nga dali kini nga gidala sa tambalanan.
Dali unta nga misibat ang suspetsadong si Bacus sa Sitio Danao Uno Brgy Valencia dakbayan sa Carcar apan nasikop kini sa gipahigayong hot pursuit operation sa mga pulis alas 3:15 sa kadlawon.
Kasong Frustrated Murder ang atubangon ni Bacus.
Gipadaplin hinuon sa kapulisan ang anggulong may kalambigitan sa politika ang pagpamusil sanglit kaniadto pa nga adunay personal nga kasungian ang suspetsado ug biktima.
