Gidala sa tambalanan ang usa ka 45-anyos nga lalaki human kini gikatahong nalumos sa usa ka creek sa Barangay Tinago, dakbayan sa Sugbo, pasado alas-10 sa buntag kagahapon Dominggo, Oktubre 11, 2026.
Ang biktima giila nga si Wilmar Tabucanon, minyo ug adunay lima ka anak.
Sumala sa amahan sa biktima nga si Felito Tabucanon, 80-anyos, nga gikan naka-inom sa ilimnong makahubog ang iyang anak sukad pa sa kaadlawon ug hubog kini sa dihang niambak sa sapa.
Saysay pa niini, naglingkod ang biktima sa daplin sa creek dihang nakadungog na lang siya og kasaba gikan sa tubig.
Sa dihang iyang gitan-aw, ang ulo na lang sa biktima ang iyang nakita sa tubig ug misulay pa kini og langoy aron maluwas apan wala kini makalingkawas tungod kay dili kini kahibalo molangoy.
Daling girespondehan ang insidente sa mga sakop sa Bureau of Fire Protection Special Rescue Force o BFP-SRF, Emergency Medical Services ug Cebu City Disaster Risk Reduction and Management Office o CCDRRMO.
Dugang ni Felito, wala na naginnhawa ang iyang anak human kini mahaw-as gikan sa tubig, hinungdan nga gisulayan kini og CPR sa mga rescuers ug daling gidala dayon ang biktima sa Cebu City Medical Center alang sa dugang nga medikal nga pag-atiman.
Giklaro usab sa amahan nga walay foul play sa maong insidente ug walay nagtukmod o nagsugo sa iyang anak nga moambak sa creek.
Sa pagkutlo niining balita, padayun pang gisuta ang dugang kumpirmasyon kalabot sa iyang kahimtang.
