CEBU CITY- Nagkatipon karong adlawa sa Mactan Expo sa Dakbayan sa Lapu-Lapu ang mga defense secretaries and ministers gikan sa Association of Southeast Asian Nations (ASEAN) alang sa opisyal nga pag-abli sa ika-20 nga ASEAN Defense Ministers’ Meeting (ADMM) 2026.
Personal nga giabi-abi ni Department of National Defense (DND) Secretary Gilberto “Gibo” Teodoro Jr. ang mga delegado, lakip na si ASEAN Secretary-General H.E. Dr. Kao Kim Hourn ug ang nagkalain-laing representante gikan sa 11 ka mga nasud nga miyembro sa ASEAN.
Sa iyang pangbukas nga mensahe, gipahayag ni Secretary Teodoro nga panguna sa mga pagahisgotan sa maong tigum ang pagpalig-on sa kooperasyon sa seguridad ug depensa sa rehiyon. Naglakip kini sa pag-atubang sa terorismo, cybersecurity, ug ang gilaumang epekto sa “Super El Niño” pinaagi sa matud pa paghatag og humanitarian assistance.
Gilauman usab nga latason sa mga diskusyon ang mga nagpadayon nga isyu sa seguridad sa Southeast Asia, ilabi na ang tensyon sa West Philippine Sea ug ang kasabutan sa ceasefire tali sa Thailand ug Cambodia.
Subay sa kalihokan, gikatakda usab ang pagpahigayon sa ADMM-Plus Meetings nga pagatambongan sa mga kaalyadong nasud sama sa Japan, Australia, India, New Zealand, Russia, ug Estados Unidos, diin miabot na sa Sugbo si US Defense Secretary Pete Hegseth.
Samtang, gikumpirma sa state media bureau sa China nga ang ilang Defense Attaché lamang ang motambong sa ADMM-Plus session ugmang adlawa, Oktubre 29.
Gitan-aw sa mga analista nga pinakaubos nga lebel sa partisipasyon sa China ang pagpadala lang og Defense Attaché sukad sila misalmot sa ADMM-Plus niadtong 2010, diin kasagaran ang mismong Chinese Defense Minister ang motambong—lakang nga gituohang gumikan sa nagpadayong tensyon sa West Philippine Sea.
Gawas sa ASEAN summit, gikatakda usab karong adlawa ang bilateral meeting sa ASEAN ug Estados Unidos, ingon man ang quadrilateral meeting tali sa mga lider sa depensa sa Pilipinas, Japan, Australia, ug US.
