CEBU CITY-Nakita sa inisyal nga imbestigasyon sa nag-viral nga video sa usa ka security guard sa IT Park, sa Barangay Apas, dakbayan sa Sugbo nga nibabag sa usa ka drayber sa habal-habal gamit ang metal nga babag, nasayran nga ang biktima misuway og ikyas aron dili madakpan.
Matud pa ni Police Lieutenant Colonel Janette Rafter, ang deputy director for operations sa Cebu City Police Office (CCPO), nga nahitabo ang insidente mga alas 5:30 sa hapon niadtong Agosto 29 sa IT Park.
Dugang pa ni Rafter, nga sa inisyal nga imbestigasyon sa kapolisan sa Mabolo nasuta nga ang 44-anyos nga biktima nga si Marson Mangubat, gikatahong nakababag sa trapiko ug nag-parking sa dapit nga wala gitugot ang pagpakanaug ug pagpasakay sa mga pasahero.
Giila ni Mangubat ang security marshal nga nibabag kaniya og metal nga babag nga si Rodelo Bertulfo ug ang ni-isyu kaniya og citation ticket mao ang Cebu City Traffic Office-deputized guard nga si Erwin Narciso, parehong taga Cherubim Security Agency.
Matud pa ni Rafter nga ilang gihimo ang imbestigasyon base sa video.
Nakigkontak ang mga otoridad sa agency sa mga guwardiya sa tinguha nga masuta kon tinuyo ba ang ilang gihimo.
Sa pikas bahin, gipahibalo ni Cebu City Councilor Pastor “Jun” Alcover, Jr. nga sa kasamtangan, ilang ipatawag ang duha ka partido aron mohatag sa ilang mga pamahayag bahin sa maong butang ug itandi ang maong mga pamahayag sa narekord sa CCTV camera.
