CEBU CITY-Nibisita si Senador Bong Go sa 72 ka mga nasunogan sa Barangay Tejero sa dakbayan sa Sugbo adlaw nga Sabado, Oktubre 7, 2023 aron sa personal nga pagdunol sa hinabang sa mga biktima sa sunog, nga kasamtangang gipabakwit sa gymnasium sa maong barangay.
Lakip sa mga hinabang nga gidunol sa senador mao ang mga relief goods, grocery packs, mga sudlanan sa tubig, sapatos, bisikleta, cellphone, relo, bola ug ingon man mga bitamina.
Gawas niini, ang mga representante sa Department of Trade and Industry (DTI) ug National Housing Authority (NHA) nipahigayon usab og assessment ug evaluation sa mga nasunogan alang sa pag-apod-apod sa financial ug livelihood assistance.
Kung diin, ang NHA aduna usab linain nga financial assistance alang sa mga biktima gikan sa ilang emergency housing program nga gisugdan sa panahon ni kanhi presidente Rodrigo Duterte, kung diin si Senador Bong Go maoy nagpasiugda kaniadto.
Sa pagkakaron, iya kining gipundohan aron makapadayon ug makapalit og mga housing materials sama sa lansang, puthaw ug uban pa alang sa mga nasunogan.
Nitambong usab sa relief activity sila si Kongresista Edu Rama, Mayor Jonas Cortes sa Mandaue City, Konsehal Dondon Hontiveros, Konsehal Francis Esparez ug ubang opisyal sa barangay.
