Gipunting sa Commission on Audit (COA) ang mga pagkalangan sa mga housing unit alang sa mga biktima sa Bagyong Yolanda sa Pilar, Camotes Island, Cebu, diin ang proyekto anaa pa lamang sa 52% nga katumanan niadtong Disyembre 31, 2025, kini bisan pa man nga nakapagawas na og P122.38 milyon nga pondo.
Diin ang proyekto, nga gipondohan pinaagi sa pinansyal nga tabang gikan sa National Housing Authority (NHA), adunay kinatibuk-ang kantidad sa kontrata nga P191.27 milyon.
Niadtong 2017, ang Munisipyo sa Pilar ug ang NHA misulod sa usa ka memorandum of agreement alang sa pagtukod og 660 ka housing units sa kantidad nga P290,000 matag usa. Diin ang kantidad matag unit gi-adjust sa ulahi ngadto sa P471,107.49 aron mahiuyon sa kasamtangang presyo sa mga materyales sa konstruksyon, nga miresulta sa pagkunhod sa giplano nga gidaghanon sa mga unit ngadto sa 406.
Ubos sa giusab nga kasabutan, ang NHA magpagawas sa pondo basi sa pag-uswag sa proyekto, samtang ang local government unit (LGU) maoy modumala sa proseso sa procurement.
Gilauman usab nga ang proyekto nga mahuman sulod sa 270 ka adlaw, gikan sa Oktubre 29, 2021, hangtod sa Hulyo 29, 2022. Apan, sa beripikasyon sa COA sa mga proyekto, programa, ug kalihokan sa Pilar niadtong Disyembre 31, sa miaging tuig, nasuta nga ang housing project anaa pa lamang sa 52% nga katumanan basi sa mga bayad nga gihimo ngadto sa kontraktor alang sa nahuman nga trabaho.
Atol sa inspeksyon sa lugar niadtong Marso 2, 2026, namatikdan sa mga state auditor ang mga kalamboan sukad niadtong Disyembre 2024 apan miingon nga layo pa kaayo ang proyekto sa hingpit nga pagkahuman. Inay ang pipila ka housing units nagpakita usab og mga timailhan sa pagkadaot sa gawas nga bahin, ilabi na sa mga pultahan ug bintana.
Subay niini, gipasangil sa COA ang mga pagkalangan ngadto sa mga extension sa panahon sa kontrata ug mga suspension order tungod sa dili maayong panahon. Apan, matod sa mga auditor, ang mga pagkalangan nagpakita og mga kahuyang sa pagplano sa proyekto, pagtimbang-timbang sa risgo, ug pagdumala sa kontrata, ilabi na sa pagpaabot ug pagpamenos sa mga risgo sa implementasyon.
