CEBU CITY-Giandam na karon sa kapolisan sa Balamban ang kaso batok sa mga responsable sa pagpatay kang Cansomoroy barangay councilor Anastacio Pacquiao.
Una niini, si Pacquiao nagmaneho sa motorsiklo dihang gipusil siya sa nagmotorsiklo nga mga mamumuno sa national highway sa Prenza, Balamban niadtong Huwebes, Oktubre 5, 2023.
Nidagan siya pagka barangay kapitan sa Cansomoroy sa umaabot nga Barangay ug Sangguniang Elections sa Oktubre 30.
Matod ni Police Colonel Percival Zorilla, hepe sa Cebu Police Provincial Office (CPPO), nga ang anak sa biktima nakaila sa namusil ug sa drayber sa motorsiklo nga iyang kaubang habal-habal driver.
Hinuon nagdumili si Zorilla sa pagbutyag sa ilang mga ngalan, aron dili makabalda sa hot pursuit operation nga gihimo sa kapulisan sa Balamban ug sa mga personahe sa Provincial Mobile Force Company batok sa mga malapason sa hinterland barangay sa munisipyo.
Sa pikas bahin si Police Lieutenant Colonel Glenn Hife, ang hepe sa Balamban Police Station, namahayag nga ang mga kriminal mahimong prisohon bisan unsang orasa tungod kay aduna silay mga outstanding warrant of arrest sa daghang mga kalapasan.
Personal nga pagdumot ang gitan-aw sa kapolisan nga motibo sa krimen.
Ang kadagkoan sa CPPO namahayag nga kinahanglan pa nga i-validate ang barangay sa dili pa nila kini maapil sa listahan sa Comelec sa areas of concern.
