Cebu City-Kapin sa 3,000 ka mga delegado ang gipaabot nga motambong sa nagpadayong National Retreat for Priest karong Nobiyembre 7 hangtod 9 sa IEC Convention Center sa dakbayan sa Sugbo.
Si Papal Nuncio Archbishop Charles John Brown maoy nangulo sa opening mass niadtong Martes, Nob. 7.
Uban sa tema nga Priesthood: A Call to Holiness, ang panagtapok sa mga miyembro sa kaparian usa ka inisyatiba sa Catholic Bishops Conference of the Philippines Episcopal Commission on Clergy kauban ang Archdiocese of Cebu.
Si Cebu Archbishop Jose Palma niingon nga ang nasudnong retreat nagtinguha sa pagpalig-on sa misyon sa kaparian nga makatabang sa pagpalawom sa espirituhanong kinabuhi sa mga matuuhon nunot sa bag-o lang nga pagsaulog sa 500 ka tuig sa Kristiyanismo sa nasud.
Samtang presidente sa CBCP nga si Kalookan Bishop Pablo Virgilio David, sa iyang bahin nagkanayon, nga ang panagtapok usa ka kahigayonan sa mga pari nga makig-alayon sa mga kaubang miyembro sa kaparian.
Ang CBCP niingon nga adunay dul-an sa 11,000 ka mga pari sa nasud nga nag-alagad sa espirituhanong panginahanglan sa kapin sa 80 ka milyon nga mga Romano Katoliko.
