CEBU CITY-Gidakop sa kapulisan sa Oslob police station ang usa ka sakop sa Philippine Coast Guard (PCG) kinsa gikatahong ubos sa impluwensya sa ilimnong makahubog tungod sa pagtion og armas sa grupo sa mga batan-on nga nitutok kaniya pasado ala 1 sa kaadlawon niadtong Biyernes, Nobyembre 10, 2023, sa Barangay Poblacion, lungsod sa Oslob , habagatang Sugbo.
Mag-atubang og kasong grave threat, kalapasan sa Comelec gun ban ug illegal possession of firearm ang 29-anyos nga suspek nga si Niño Jade Diaz Culanag, taga Barangay Looc sa maong lungsod human gitiunan ang biktima nga si Mike Gumapon.
Subay sa imbistigasyon sa kapulisan sa Oslob, ubos sa pagdumala ni Police Captain Ian Macatangay, hepe sa Oslob Police Station, nga Human sa pagpaniuon pasado ala-una, nakapangayo og tabang si Gumapon sa kapolisan alas 3:30 sa buntag pinaagi sa pag-adto sa police station.
Nagkanayon ang biktima nga gitiunan siya ni Culanag atubangan sa usa ka convenience store sa Poblacion.
Dayong adto sa kapolisan, wala na ang maong suspect hinungdan nga mipahigayon sila og usa ka hot pursuit operation ug didto na nakit-an ang suspect sa Barangay Looc, Oslob nga naglingkod sa iyang motorsiklo.
Positibong nasakmitan ang maong suspect sa iyang handgun nga expired na diay ang lisensya.
Sa pakisusi sa kapolisan, nasayran nga ang biktima nagkaon og snacks uban sa iyang barkda, sa dihang niabot ang suspect ug iyang mga kauban aron mopalit og mainom, gitan-aw sa biktima ang suspect hinungdan nga nasuko kini.
Dugang pa sa kapolisan, posibleng hubog na ang suspect sa dihang miadto sa convenience store.
