CEBU CITY-Padayon ang manhunt operation sa Police Regional Office (PRO) 7 batok sa duha ka suspetsado nga si sila tong Bacalso Rafols ug Ramil Salazar nga maoy responsabli sa pag pusil patay kang Police Corporal Ryan Languido Baculi niadtong milabayng miyerkules sa kaadlawon sa Barangay Kinasang-an sa dakbayan sa Sugbo.
Gibutyag ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa kapulisan sa Central Visayas nga naa pa sa dakbayan sa Sugbo ang duha nga padayon nga nitago-tago.
Gidugang ni Pelare nga ang duha ka mga gihulagway nga kriminal naningkamot nga mopasok sa mga kabalayan aron nga dili dali masakpan sa mga nangita nga mga pulis.
Mituo ang mga kapulisan nga adunay nagpaluyo sa pagtago sa mga personalidad, apan nangita ang mga kapulisan og pamaagi aron masikop sa labing dali nga panahon ang mga naasoy nga mga suspek.
