CEBU CITY-Ni-anhi sa sibyaanan ang traffic police investigator sa Naga City Police Station nga si Police Chief Master Sgt. Ronald Bahian aron sa pagpasabot sa iyahang habig subay sa pangangkon sa usa ka amahan nga gidali-dali sila sa pag paperma sa ‘Compromise Agreement’ ug siya ang nihimong ‘masyador’ sa Management sa Bus.
Giklaru ni Bahian nga ang ‘Compromise Agreement’ gihimo sa usa ka law firm office nga naa ang duha ka habig, apan wala siya nanghilabot kabahin niini, sukwahi sa pangangkon sa mga ni-reklamo.
Dugang pa, nga wala gipugos ang maong mga amahan sa biktima ug ilahang kabubut-on nga mokuyog sa Management sa bus padulong sa law firm office.
Gitumbok niini nga gipangutana usab ang mga biktima sa law firm kung wala naba silay laing mga pangutana o wala ba silay lain na nga i-dugang sa dili pa permahan ang maong agreement.
Subay usab sa pangangkon sa ginikanan nga siyay miingun nga dili mopili ug mahal nga lungon, hugtanun kini niyang gipanghimakak ug gibarugan nga dili siya ang kuyog sa pamilya padulong sa punerarya, kundili ang representante sa Bus Management.
Dugang pa nga kabahin sa giingun sa mga amahan sa biktima nga napugos sila sa pagperma, gitumbok niini nga kung tinood man mamahimo sila nga dili mu perma atung higayona ug mu balik pagka ugma.
Gibarugan niini nga walay hulga ug pagpanghadlok ang nahitabo kay ug anaa man gani, mamahimo na sila nga moreklamo atung panahona.
Gipasabot usab sa binisaya nga pulong ang amahan sa mga biktima sa mga staff sa law office kabahin sa “Compromise Agreement”, sukwahi sa ilahang pangangkon nga wala kini nila masabtan kay anaa sa ‘english’ nga pinulungan.
