CEBU CITY-Kompirmado na nga sa Enero 13 ug 14, 2024 mahitabo ang Sinulog sa Kabataan sa Lalawigan ug ang Sinulog sa Kabataan sa Dakbayan, nga kabahin sa kinatibuk-ang kalihokan sa Sinulog karong tuiga.
Gibutyag ni Cebu City Mayor Mike Rama, mahimong ibaylo (sa Enero 14 ang Sinulog sa Kabataan sa Lalawigan) nga ipahigayon ang maong kalihokan sa Enero 18 o kaha 19, nga mao untay gipangayo ni Gobernador Gwen Garcia.
Atol sa usa ka press conference nga gipahigayon kagahapon adlawa, Enero 2, 2024, diin gitambongan ni Bise Mayor Raymond Alvin Garcia, niingon si Mayor Rama nga kini tungod kay duol na kaayo ang gihangyo nga mga petsa sa Enero 21, kanus-a mahitabo ang Sinulog.
Gitataw usab ni Mayor Rama nga ang Sinulog sa Kabataan sa Lalawigan ug ang Sinulog sa Kabataan sa Dakbayan ipahigayon sa Cebu City Sports Center, dili sama sa Sinulog nga adto mahitabo sa South Road Properties.
Kabahin sa seguridad sa mga manayaw, ilabi na kay moagi ang mga contingents sa mga bahin sa dalan Osme a Blvd. nga anaay gihimong pagtukod sa mga estasyonan sa Bus Rapid Transit (BRT), gibutyag ni Atty. Collin Rosell, Cebu City administrator, nga gibakbak na og sugod ang mga separator nga may mga bahin nga nanglabaw.
Kini aron sa pagsiguro nga walay mangapandol o madisgrasya sa mga manayaw.
Dugang ni Rosell nga humanon sa contractor sa BRT ang pagbakbak sa dili pa magsugod ang gitakdang mga prosesyon isip kabahin sa kapistahan sa Balaang Bata.
