CEBU CITY-Gikatakdang ibalhin sa kagamhanan sa dakbayan ang dul-an sa 1,115 ka mga panimalay nga nagpuyo daplin sa Suba sa Lahug karong tuiga.
Gibutyag ni Joelito Baclayon, Lahug River commander, nga ang Task Force Gubat sa Baha (TFGsB) mobalhin sa mga apektadong panimalay kon mahibaw-an na ang relocation site.
Matud ni Baclayon nga gusto sa TFGsB nga mabawi ang tulo ka metros nga easement sa Lahug River aron masiguro ang kaluwasan sa mga residente nga nagpuyo didto.
Dugang niini, ang Cash for Work program sa dakbayan maoy laing inisyatiba nga gitumong sa pagkumbinser sa mga apektadong panimalay nga motabang sa kampanya sa TFGSB.
Subay sa maong balita, ang Cash For Work beneficiaries madawat og P435 kada adlaw sulod sa 10 ka adlaw nga trabaho.
Matud ni Baclayon nga gusto usab sa TFGsB nga ang mga pribadong establisemento nga nagnegosyo daplin sa Lahug River mokooperar sa Siyudad.
Labing menos duha ka mga establisemento ang partially complied sa ilang mga hangyo nga tangtangon ang ilang mga istruktura nga nahimutang sulod sa tulo ka metros nga easement sa suba.
Nihangyo si Baclayon sa Business Permit and Licensing Office (BPLO) nga pahinumdoman ang duha ka establisemento sa pagtuman sa ilang responsibilidad.
Gidugang ni Baclayon nga ang duha ka mga establisemento nagsugod sa pagguba sa ilang mga istruktura sa miaging tuig apan wala kini makompleto.
Naglaum usab si Baclayon nga mapadayon sa duha ka establisemento ang demolisyon sa dili pa matawag sa BPLO ang ilang atensyon.
